如何減低你老婆患上產後抑鬱的機會？

如何減低你老婆患上產後抑鬱的機會？

1. 每日幾忙都好，爭取時間同你老婆同個 B 一齊玩。你老婆由生仔o個一刻不斷湊仔，又因為生仔而身體差晒，淨係 feel 到好累同好痛，心理上冇咁快感受到生仔既喜悅。儘量製造一下家庭樂，等佢都享受到生仔既喜悅。

2. 生仔前買一部 iPhone / 集影相影片上網玩樂於一身既智能電話俾你老婆。（或者游說你老婆買一部亦得）由生仔留院到坐月，你老婆大部分時間都係對住粒 B／自己一個人，又唔出得街，又未必下下有精力去開電腦，一部輕巧既電話俾佢自娛一番係可以抒緩情緒，特別係餵夜奶冇人同佢傾計既晚上。

3. 你老婆夜晚餵夜奶其實好辛苦。你未必可以幫到手，但千祈唔好淨係掛住訓，至少叫兩聲等佢知道你知道佢忙碌中。當你老婆餵完奶，幾豬扒都要轉個身去攬下佢，佢一個人成晚眼光光餵奶，又冇得訓，好需要有人疼錫。

4. 每朝起身第一件事係去廚房座熱一杯鮮奶，然後先去做其他野（刷牙洗面上網玩面書 whatever），幾分鐘後記得返轉頭拎杯奶俾老婆飲。你老婆夜晚餵完夜奶其實好肚餓，但又冇力去廚房拎野食，第二朝起身面都未洗又要即刻餵奶，真係好好好肚餓。座熱一杯鮮奶所花既時間好短，但至少俾你老婆頂下肚，又窩心。

5. 當你老婆餵完奶個樣死下死下，記得伸出雙手幫手掃風抱 B 抹面換片。餵人奶你幫唔到，唯有做下其他野幫佢湊 B，唔好淨係玩 B。

6. 如果一班專業阿媽仲追問「做左 XXX 未啊？」你幫你老婆搞啦，因為餵完人奶真係冇晒力，個腦都 function 唔到，你仲要求佢可以做乜呢？俾你老婆慢慢學湊仔啦。

7. BB 係好可愛，但唔好淨係同個 BB 講野。你老婆o係隔離都想你同佢講下野。

8. 你老婆出院頭一個星期身體仲未有力，傷口仲會痛，行步路都要搵野扶，所以唔好要佢操勞任何野，叫佢去拎野都唔好。一個星期後，到佢傷口好返可以行路既時候，但晚晚餵奶精神都仲未好，所以盡量俾佢 hae，等佢回復精神同平穩情緒。

9. 餵人奶其實令到成個人好乾，多斟水俾佢飲；可以既話，買少少多汁既生果，俾佢可以滋潤一下。

10. 如果你老婆而家餵 B 餵到冇乜表情，又唔多出聲，其實佢真係好累。記得主動同佢講多兩句，俾佢知道你都知佢辛苦。

最後，如果佢湊 B 捱左咁耐，都冇發你脾氣，仲寫篇「如何減低你老婆患上產後抑鬱的機會？」自娛一番，其實佢算有耐性架喇，仲有兩分幽默同三分文彩，好好珍惜。

btw，其實我老公都真係好好，佢真係咁忙都努力做晒所有家務同上述事情！讚！

由於閃閃太懶訓，要出動「豬扒戰隊」叫醒閃閃起身飲​奶。